वि.सं. 2055 मा स्थापना गरिएको कोहलपुर उद्योग वाणिज्य संघ (KOCCI) कोहलपुर शहरस्थित व्यापारिक समुदायको स्वतन्त्र, गैर–सरकारी तथा प्रतिनिधि संस्था हो।

संघका गतिविधिहरू व्यवसाय–सम्बन्धी विषयमै सीमित नरही यसले कोहलपुर क्षेत्रको स्थानीय आर्थिक विकास, शहरी सौन्दर्यीकरण तथा यस नगरलाई मध्य–पश्चिमाञ्चलको प्रमुख व्यापारिक केन्द्रका रूपमा स्थापित गर्ने अभियानलाई प्राथमिकतापूर्वक अघि बढाउँदै आएको छ।

संघले शिक्षा, स्वास्थ्य, कृषि, पर्यटन तथा पूर्वाधार विकासलाई कोहलपुरको दीगो आर्थिक विकासका प्रमुख आधारस्तम्भका रूपमा अंगीकार गरेको छ। समयअनुकूल चुनौतीहरूसँग व्यावसायिक ढंगले अन्तरक्रिया गर्न सक्षम संघको कार्यसमितिले उत्कृष्ट टोली–कार्य प्रस्तुत गर्दै आएको छ।

सृजनशील सोच, अग्रसर कदम र व्यवहारिक दृष्टिकोणका कारण कोहलपुर उद्योग वाणिज्य संघले आफ्नो विशिष्ट पहिचान कायम गर्न सफल भएको छ। यसै कारण, संघले आर्जन गरेका अनुभव र उपलब्धिहरू अन्य व्यापारिक तथा सामाजिक संस्थाहरूका लागि अध्ययन–अनुकरणीय बनेका छन्।